المتابعون

الثلاثاء، 13 مارس 2012

بدون عنوان...أنا !!


لقطات سريعة عدت فى لحظات شوفتها فى خيالى..بدايةَ من ساعة ما مليت اوراق "باسبورى" الى لحظة كتابة السطور دى..
زمان اول ما شوفت ختم "التاشيرة" ، حسيت للحظة انى بدأت أول خطواتى على طريق النجاح والحرية.. وابتسمت ابتسامة "النصر" على كل الفشل اللى مريت بيه..وكل الاخفاقات اللى حصلتلى ..وقسوة النظر ليك دايما على انك فاشل.. وكل الايام الصعبة اللى عمرها ما هاتروح من الذاكرة..
اشتريت "شنطة" كبيرة ..قالولى املاها بكل حاجاتك اللى هاتحتاجها فى غربتك.. حط فيها افراحك كلها .. وما تنساش احزانك ، شقاك وفشلك... وكل هوامش حياتك و اوراق ذكرياتك..
وبدأت اخد كلمات وداع من كل الأحبّة..وحسيت اوى فرحتهم بيا..وحزنهم عليا فى نفس الوقت..
جمّعت كل دموع امى جوة قلبى ..علشان أبدّلها لما ارجع تانى فرحة وابتسامة..لكن الغريب انك بردو بترجع بتشوف نفس الدموع!! .. احنا شعب عجيب حتى فى الفرح بنبكى!
بتاخد معاك كمان ابتسامة والدك..اللى كلها مكابرة بالفرحة..وهى مخبية حسرة ووجع..وأحيانا بيفلت القناع وبينهار...وبتطلع الحقيقة!...بيديك "ضمة" عمرك فى يوم ما هاتحس بيها فى حياتك من حد.. مهما حبيت او اتحبّيت.
بتاخد قبلات كلها حنية وحب..من اخواتك على خدودك..ومش بتبقى عايز تمسحها طول عمرك!....
فى لقطة تانية..بتبص جوة وشوش يمكن مش هاتشوفها تانى ....عمرى ما هانسى وش جدتى-الله يرحمها- وهى بتقوللى بابتسامة: "أنا استنيت كتير وكنت عايزة اشوف حبيبتك ، لكن انت اللى اتأخرت ، لو جيت المرة الجاية مالقتنيش انت حر" ...وكأنها حلم حياتها انها تشوف حبيبتى..اللى حسيت ان منتظرينها كتير ، والتخيلات عنها اكتر!..
لكن للأسف دى كانت آخر نظرة فى وشها اللى كل جزء فيه مليان حنّية ، وعظمة وصبر وحُسن وايمان..
لكن ان شاء الله أوعدِك انك هاتشوفيها فى يوم..وهانجيلك زيارة مخصوص...

بعد ما بتاخد كل ده.....بتمشى.....وانت شايف كفوف مرفوعة بتقولك "سلام" .. وعيون فيها مليون احساس..من فرحة على حزن على أمل برجوعك من تانى....

أول ما بتوصل الناحية التانية...وتبدأ تفتح "شنطتك" ..تتفاجئ ان كل حاجة فيها بتهاجمك وتعذبك وبتقتلك...تقفلها وترميها..لكن فى لحظة شوق..بتفتحها تانى وتبدأ تقلب فيها.. ساعات بتلاقى ورقك القديم..تقراه ..وتلاحظ انك من غير ما تحس انك مبتسم وانت بتقراه...برغم كل الالم والوجع ....

تبدا رحلة تانية جديدة... دايما مسيطرة على تفكيرك... وهى رحلة "الأمل" ، وعدّ الأيام والشهور.. والصراع مع الوحدة.. وتكلم نفسك ... ودايما " تأمًل" نفسك..واكتر كلمة بتقولها لنفسك "هانت"....
هــــــــــانت..
13-03-2012
08:28 م


السبت، 10 مارس 2012

بيوت



فى طريق حياتك هاتقابل كتير،وهاتتعلم كتير..اللى يعيش ياما يشوف ،واللى يتغرب هايشوف اكتر..
ساعات باحس ان الناس زى البيوت!،كل بيت وله "روح" و "شكل" و "اسرار" .. بيوت سعيدة وبيوت كئيبة ، بيوت مريحة طيبة وبيوت متعبة وخبيثة ، بيوت منورة وشفافة ، وبيوت ضلمة ومخيفة ...وكتير أوى كنت فاكر نفسى انى بامتلك موهبة الحكم على الناس من اول نظرة..علشان كتير كان حكمى دايما بيطلع صح ، لكن اكتشفت بعدها انى غلطت كتير فى حكمى، وانها مش موهبة عندى ، كانت مجرد توفيق من ربنا فى مرات معينة مش اكتر...
اصل انا من النوع اللى لما بأستريح لحاجة او لحد ممكن ياخد عيونى ، وكمان لما باقفل من حاجة او من حد ،لو فضلت 100 سنة تقنعنى مش هاقتنع .. انا كدة دماغى جزمة...
اللى اتعلمته فعلا،ان عمر ما هيكون حكمك على الناس صح لو بتحكم من برة ..زى ماكنت باعمل..
ياااااااما زورت بيوت شكلها حلو جدا من برة ، وماقدرتش تحس فيها بأطمئنان لخمس دقايق...وياما شوفت بيوت شكلها اقل من العادى ، لكن لما تدخلها تفتح قلبك ع البحرى ....
وسر غموض اى حاجة فى حياتك انك ما قربتش لها ، ماحاولتش تفك طلاسمها..وطول مانت فى دماغك ان الحاجة دى غامضة وساكت ، عمرك ما هتعرفها ، لانك اصلا ماحاولتش تعرفها...
عايز تعرف حد صح؟ مش بس تقرب منه،لأ..ادخل جواااااه..استعمل حواسك الخمسة معاه..المسه من جوا.. حسه..دوقه..اسمعه..عاين كل تعبير فى  وشه..عن قرب ......... اعرفه..
03:20 ص
10-03-12

الخميس، 1 مارس 2012

قلبى أنتيكة نادرة!



قوضة ضلمة ، جواها حاجة  وحيدة  من كل حاجة ،حتى فنجان الشاى وحيد ، حاجة عجيبة اوى!!
ساعات وانت معلق عنيك فى سقفها وبتفكر ، تتخيل ان القوضة دى هى ( انت )! ، بص عليها بزاوية من فوق ، وانت هاتعرف  ،،،هاتشوف أنتيكة قديمة مركونة فى ركن القوضة الشمال ، من التراب اللى عليها شكلها بيقول انها عدى عليها زمان وهى كدة مكانها ، وأول حاجة هاتيجى فـ بالك ،هو ليه مفيش حد حاول يمسح ترابها! ، مع انها لو اتلمعت هاتبقى تحفة .. يادوب كل اللى محتاجاه بس "قطنة بيضا صافية" ...
لكن واضح كمان من آثار الرجلين ان فيه ناس كتير دخلوا القوضة ، لكن زى ما بيدخلوا بيخرجوا تانى من غير ما يلمعوها ، يمكن مش باينة أوى من كتر"الكراكيب" اللى حواليها! ، ورق قديم ، مليان ذكريات قديمة ، وعلب قديمة ، وتذاكر سفر قديمة...........
وفى اقصى حتة فـ القوضة ،هاتشوف "تابلوه" متعلق، غريب اوى! ،مش اى حد يفهمه ، مرسوم جواه رسم جميل ، لكن للأسف حزين شوية ، هاتشوف طفل جميل بس بيبكى، ودموعه نازلة على خدوده! ، لأول وهلة لما تبص على التابلوه ،هاتحس بالسيكوباتية والكآبة ،لكن لو قربت شوية وركزت، هاتلاقى نفسك بتفكر وعنيك بتروح على حاجات كتير فى التابلوه ،حاول تفهمها بشكل تانى هاتلاقى شعور الكآبة راح ، وهاييجى مكانه كذا شعور مختلطين مع بعض ، ممكن تشوف فى لحظة لما عنيك تقع على وشه بالكامل قد ايه هو برئ ،ولحظة تانية لما عنيك تقع على دموعه يجيلك شعور بالشفقة عليه ، وايه حصل له علشان يبكى كدة! ، ولما تركز فى عيونه ، هاتكتشف ان فيه ألف سر مدفون وراهم....
ليا رجاء وحيد... لو دخلت القوضة - قوضتى- وحسيت انك مش مبسوط ،ياريت تسيبها زى ما هى ، وياريت ماتسيبش أثر لخطوتك .... ولو حسيت انك تقدر تغيرها ،كل اللى هى محتاجاه حاجتين بس ، "فرشة" تعدّل رسم التابلوه، تمحى دموعه وتغير النظرة ، و "قطنة بيضا صافية" تلمع الأنتيكة..

مالاقيش معاك فرشة وقطنة ؟؟

محمد سعد
01-03-2012
2:56 ص