المتابعون

السبت، 14 ديسمبر 2013

عن الأوغاد صحاب السوء
وعن شلة بتجمع بين
(تجارة وهندسة وحقوق)
وعن لمتنا ليلة العيد
وعن خطة ريال مدريد...
وعن علبة سجاير " كينت " تتفرتك ف فيلم جديد
وعن قهوة زيادة تقيل
وسقعة ف كوبري قصر النيل
وعن بوسة بنسرقها ف اخر كرسي ف السيما
وعن سحلتنا ف الساقية عشان نحضر بلاك تيما
وعن واجب ف يوم فرحك ف غاية قلة القيمة
وعن لبس ف دولاب صاحبك تشُك بانه ده بتاعك
وعن تهريج قلَب بغباء فسايب جرح ف دراعك
وعن ( من بكره هنصلي )
وننسى نصلي كالعادة
واول يوم تشوف صاحبك
ببدلة جيش وببيادة
وعن افلام محمد خان ، وعن انغام
وعن نفس السؤال اياه ( جايب جذمتك دي بكام ) ؟
وعن جو المراكبية " تعالي اتفضل اشرب شاي "
وعن طلعتنا ع الساحل و ( مين قال جاي )
وعن ضحكة سعاد حسني ، وعن الحان عمر خيرت ، وعن البوم منير الجاي
وعن احلام حاولنا كتير نحققها وماقدرناش
وعن اوقات صحيح صعبة
لكن ليها لزوم تتعاش
وعن كل الحاجات الصح ف الدنيا
عن الشلة اللي انا منها
ومهما باقول دي ناس صايعين
يلاقوا مصيبة نعملها
الاقي نفسي قولت "امين"
يا اصحابي
يا اصيع خلق ف الدنيا
انا ممتن ليكوا بجد
علي وقفتكوا وقت الجد
وع السر اللي ف صدوركم
ولا قولتوه ف مره لحد
أشكركم
وبأمركم تكونوا معايا للآخر
بضحكتكوا اللي بنت بنوت

عن العشرة اللي عاوزة تعيش
ف وقت مافيه حاجة مش بتموت .

الأربعاء، 4 ديسمبر 2013

جيفارا مات

جيفارا مات
شعر : أحمد فؤاد نجم
غناء : الشيخ إمام


-------------------------------------
جيفارا مات
جيفارا مات
آخر خبر فِ الراديوهات
و فِ الكنايس
و الجوامع
و فِ الحواري
و الشوارع
و عَ القهاوي و َ البارات
جيفارا مات
جيفارا مات
و اتمد حبل الداردشة و التعليقات
********
مات المناضل المثال
يا ميت خسارة عَ الرجال
مات الجدع فوق مدفعه جوّه الغابات
جسّد نضاله بمصرعه
و من سُكات
لا طبالين يفرقعوا
و لا اعلانات
********
ما رأيكم دام عزكم
يا انتيكات
يا غرقانين
فِ المأكولات و الملبوسات
يا دفيانين
و مولعين الدفايات
يا محفلطين (1)
يا ملمّعين يا جيمسنات
يا بتوع نضال آخر زمن
ف العوامات
ما رأيكم دام عزّكم
جيفارا مات
لا طنطنة
و لا شنشنة
و لا إعلامات و استعلامات
عيني عليه ساعة القضا
من غير رفاقه تودّعه
يطلع أنينه للفضا
يزعق و لا مين يسمعه
يمكن صرخ من الألم
من لسعة النار فِ الحشا
يمكن ضحك
أو ابتسم
أو ارتعش
أو انتشى
يمكن لفظ آخر نفس كلمة وداع
لَجل الجياع (2)
يمكن وصية للي حاضنين القضية
بالصراع
صور كتير ملو الخيال
و ألف مليون إحتمال
لكن أكيد و لا جدال
جيفارا مات موتة رجال
*******
يا شغالين و محرومين
يا مسلسلين (3)
رجلين و راس
خلاص خلاص
مالكوش خلاص
غير البنادق و الرصاص
دا منطق العصر سعيد
عصر الزنوج و الامريكان
الكلمة للنار و الحديد
و العدل أخرس أو جبان
صرخة جيفارا يا عبيد
في أي موطن أو مكان
ما فيش بديل
ما فبش مناص
يا تجهّزو جيش الخلاص
يا تقولو عَ العالم
خلاص