المتابعون

الاثنين، 4 فبراير 2013

الأولة ثورة ::
ثورة شباب جدعان ....... اتجمعوا في ميدان ....... لا معاد ولا عنوان ....... هتفوا بسقوط فرعون ....... ورث البلد هامان !!!!!!!

والتانيه غدرة ::
غدروها ناس خاينين ....... لبسوا عباية الدين ....... إخوان وسلفيين ....... اتفقوا ويا هامان
... .......والشعب قال آمين !!!!!!!!!

والتالتة حسرة ::
علي شلالات الدم ....... علي ثورة كانت وهم ....... علي أم عايشة في غم ....... أبسط حقوقها قصاص ....... لم تلقي غير الظلم

________________________

هتف الشجــاع في الماتش ....... وساعتها كـــــنا سكــوت
العسكري ميحكـــــــــــــمش ....... قالها ومخافــــش المـوت
غضب الشيطان مسكـــتش ....... أمر الخسيـــــس هلفوت
يقتل رجـــــــــــال بالغـــــــش ....... بالغـــــــــــدر مش ببارود
رجع الشجــــــاع في النعش ....... فجر طوفان مكبــــــــــوت
علي الخسيــــــس مقدرش ....... قام حاكم الهلفـــــــــــوت
الحــــــــــــــــــــــق ميزعلش ....... دا مش قصاص مظبـــــوط

__________________________

يادي النظـــــــــام الغبي ....... بان غرضك المفضوح
شاف الجميع خطتــــــك ....... من غير ما بيها تبوح
______________

فاكر القنـــــــال عزبتــــك ....... تفرض عليه سطوتك
شكلك نسيت حبستك ....... للسجن بكـــــرة تروح
فارقنـــا يـــــا حضرتـــــك ....... مدن القنـــال حظرتك
أم الشهيـــــد عزلتـــــك ....... والصلح غيــــر مطروح
_______________

يا كل مصــــــــري حـــــر ....... خدها من جــــــدودك
لو راد عـــــــدوك شــــــر ....... بالفرقة بيســــــــودك
نشرب كاســـــــات المر ....... يضيق علينــــــا القبر
يمـــــل منــــــا الصبــــــر ....... كله فدا وجــــــــــودك

___________________________

الثورة في الإنعـــاش .............. بين الحيـاة والمــــــوت
سرقوها ناس أوباش .............. في ظلمهم طاغـــــوت
بياخدوا خيرها بلاش .............. وصوت الشهيد مكـبوت
يهتف بحق مجـــاش .............. يهتف لكن في سـكوت
الظلم مهما عــــاش .............. الحق صعب يمـــــــــوت

بقلم
أسماء السيد

الأحد، 3 فبراير 2013

حمادة .. و المر بزيادة

حادثة حمادة اكبر دليل على ان فيه قطاعين عريضين فى البلد.. الاول هما الناس اللى ممكن تبيع اى حاجة مقابل فلوس او رشوة او حتى زيت وسكر... التانى هما الناس الضعيفة الغلابى اللى مالهومش ضهر يحميهم وبيحطوا جزمة فى بوقهم ويسكتوا..... وانا اتوقع ان الشعب كله كمان شوية هيبقى عبارة عن القطاعين دول ... يا هنموت من الفقر والجهل والمرض.... يا اما مش هنقدر نفتح بوقنا بكلمة واحدة !!!
 لكن يظل هناك سؤال وجودى محورى : ياترى حمادة كان لابس عباية بكباسين ولا من غير كباسين؟؟

الجمعة، 1 فبراير 2013

احنا السبب!


احنا السبب لما بقينا مش قد المستوى الما الفساد فينا انتشر والضلال طاب واستوى...
سلط علينا ربنا اللى مايرحموش
زى الديابه المسعورين
وقام كبيرهم صاح فينا وعوى

سرقوا شقانا مصوا دماناا
كلوا البلح هما
ورمونا أحنا بالنوي

وكل واحد فينا
داق من الظلم حته
وكل واحد فينا بالنار انكوى

وبقينا زى الشحاتين
نستجدى الجيران
الى يفتح لينا بابه
واللى يقولنا تستاهلوا
جتكوا الاوى

وبقينا زى الغرقانين
لاحد فينا قدر ينطق بالشهاده
ولا حد فينا شبع
ولا حد ارتوى
دى فضفضة
 سامحونى