صباح الخير .. النهاردة هو عيد ميلادى الـ 29 ، بالتحديد الساعة 10:05م :)
بأشكر كل اللى هنونى واتصلوا بيا أو كتبولى .. لا تتخيلوا أنا كل سنة باستنى اليوم ده قد ايه كلامكم بيخلينى فى السما...
لكن السنة دى بالذات مش عارف ليه عندى أحاسيس كتير غريبة ومتناقضة .. بين الفرح والحزن... احساسك بأنك على أعتاب الـ30 منتهى الصعوبة ... لأن بوابة الـ30 علشان تدخلها لازم تكون حققت حاجات كتير علشان تقدر تعيش نص حياتك التانى- إن كان فيه فى العمر نص تانى- وكمان قبل ما تبدأ تعانى من أعراض التلاتينات ، من زهايمروفصام وأضطراب وهلاوس سمعية وبصرية وأحلام يقظة ...
من كام يوم قررت أشترى كشكول أكتب فيه كشف حساب لكل المرحلة اللى فاتت ..كتبت كل الأحلام الكبيرة والصغيرة .. فوق الـ100 حلم ... وحاولت أكتب اللى اتحقق منها .. تحت بند "الأنجازات" .. لقيت أبرزها مثلا : انى لسة على قيد الحياه... إنى اتخرجت (حتى لوإنى ناقصنى كتيرماتعلمتوش).... انى مثلا بأخد مرتب (بدون ما أعمل حاجة تقريبا) .. وبأصرف اكتر من اللى بأكسبه ماتسألش ازاى! ....حاجات كدة من قبيل "انجازات مرسى" ...
أقدر ألخص لك احساسى بالظبط دلوقتى فى مثل بسيط ....
تخيل ان الأهلى بيلعب ع الكاس ومغلوب بفرق هدف و وصل للدقايق الأخيرة ... مفيش قدامه فرصة تانية غير انه يسجل هدف يتعادل علشان يقدر يكمل أشواط اضافية أملاً فى انه يكسب ...
قمة الصعوبة والتناقض ... ما بين الأمل والاصرار والطموح .... وبين الندم على ضياع الوقت والفرص .... والتمنى بإعادة الماتش من أوله ... أكيد كنت هتغير حساباتك وخططك من الأول.. كنت هتستبعد ناس شاركوا ... وناس كتير بدلتهم بين الشوطين استغنيت عنهم وبعدها ندمت على خروجهم ... كنت هتستغل فرصك ووقتك أحسن ...
الحقيقة من المستحيل انك ترجع للخلف ....أمر واقع ، لكن على الاقل لسه فى فرصة لصنع النهاية... سواء بالنجاح او بالفشل ... وفى الحالتين مستفيد ..
بالمناسبة النهاردة 15 شعبان ... كل سنة وكل المسلمين بخير ... ولازم نفتكر حديث الرسول (صلى الله عليه وسلم) :
«يطلع الله إلى جميع خلقه ليلة النصف من شعبان فيغفر لجميع خلقه إلا لمشرك أو مشاحن»
أتمنى بجد محدش يكون زعلان منى أو لسه شايل فى قلبه حاجة عملتها و زعلته علشان فعلا عمرى ما قصدت أزعل حد .. ولا عمرى كرهت أو شيلت من حد ....... خلونى أدخل النص التانى من عمرى وأنسوا نصى الأولانى ، علشان أنا نسيته....

i really loved it muhammad
ردحذفLook .. when i was in the holiday of my second class in school of law , i was really disappointed .. i couldn`t attend but really few days of the year in Egypt , i couldn`t enjoy my college days and i had dozens and dozens of dreams and goals that i couldn`t live because of that .. I told myself ( it`s too late , i will never compensate for that )
Then i watched a football match in TV
the team that Ahmed and dad liked was the loser team till the last five minutes ,, and the played really bad
The result was 2-0 .. Guess what ? They scored 2 marvelous goals in the last 5 minutes !
It was a lesson for life time for me .. I never forget this :)
It`s never too late :)
Dr.Eman Im honored u like it :)
ردحذفur words made me so happy now ;)